步數：用機械手骨來確定(亻因)撨有齊齊，共1號金角(抹SCP-170的金角)完全捒迵過2號金角，賰1塊寸尺共原底兩塊攏相仝的金角。
Pōo-sòo: Iōng ki-hāi tshiú-kut lâi khak-tīng in tshiâu ū tsiâu-tsê, kā 1 hō kim-kak (Buah SCP-170--ê kim-kak) uân-tsuân sak thàng--kuè 2 hō kim-kak, tshun 1 tè tshùn-tshioh kā guân-té nn̄g tè lóng sio-kâng--ê kim-kak.
結果：佇檢查賰落來彼塊獨一金角的時發現伊的密度是每cm^3 38.6公克，拄好是黃金的密度的兩倍。著算講共見本提去鎔嘛袂改變，得著的結果是金水的密度仝款。這定著代表是物質無互相搢開──每一个原子攏是。對原子做分拆證明(亻因)攏是普通的金原子，定著代表(亻因)毋捌核融合加添密度。原子只毋過予搢入看起來比物理定準所容允閣較細的空間。
Kiat-kó: Tī kiám-tsa tshun--lo̍h-lâi hit tè to̍k-it kim-kak--ê sî huat-hiān i--ê bi̍t-tōo sī muí cm^3 38.6 kong-khik, tú-hó sī n̂g-kim bi̍t-tōo--ê nn̄g-puē. Tio̍h-sǹg-kóng kā kiàn-pún the̍h khì iûnn mā buē kái-piàn, tit-tio̍h--ê kiat-kó sī kim-tsuí--ê bi̍t-tōo kâng-khuán. Tse tiānn-tio̍h tāi-piáu sī bu̍t-tsit bô hōo-siong tsìnn khui - muí tsi̍t ê guân-tsú lóng sī. Tuì guân-tsú tsò hūn-thiah tsìng-bîng in lóng sī phóo-thong--ê kim guân-tsú, tiānn-tio̍h tāi-piáu in m̄ bat hu̍t iông-ha̍p lâi ke-thinn bi̍t-tōo. Guân-tsú tsí m̄-koh hōo tsìnn-li̍p khuànn--khí-lâi pí bu̍t-lí tīng-tsún sóo iông-ún koh khah sè--ê khong-kan.
照這个試驗，██████博士要求用SCP-170共兩塊鈾『黏』做伙的允准，以製造較(敖力)裂變的見本。因為掛煩著淺現的安全問題，這項要求予拒絕矣。
Tsiàu tsit ê tshì-giām, ██████ phok-sū iau-kiû iōng SCP-170 kā nn̄g tè Iū 'liâm' tsò-hué--ê ún-tsún, í tsè-tsō khah gâu lia̍t-piàn--ê kiàn-pún. In-uī khuà-huân tio̍h tshián-hiān--ê an-tsuân būn-tê, tsit hāng iau-kiû hōo kī-tsua̍t--ah.
試驗12：
Tshì-giām 12:
試驗材料：1 x D-級人員，1 x 柴桌仔。
Tshì-giām tsâi-liāu: 1 x D-Kip jîn-uân, 1 x tshâ toh-á.
步數：第一擺用活體生物做試驗。共一屑仔SCP-170抹佇D-級人員正手二指，紲來命伊去「揬桌仔」。
Pōo-sòo: Tē it pái iōng ua̍h-thé sing-bu̍t tsò tshì-giām. Kā tsi̍t-sut-á SCP-170 buah tī D-Kip jîn-uân tsiànn-tshiú--ê jī-tsáinn, suà-lâi bīng i khì "tu̍h toh-á".
結果：目標人員的二指到第一節沉入桌仔內底。雖然伊真驚惶，但是報告講佇接點以下袂感覺著疼、礙虐抑是其他知覺。毋過伊的指頭隨開始譀腫佮起烏青，因端伊的行氣系統直直共血拍入有去無回的彼區。指頭對第一佮第二个骨輪中央予截斷。
Kiat-kó: Bo̍k-piau jîn-uân--ê jī-tsáinn kàu tē it tsat tîm-li̍p toh-á lāi-té. Sui-liân i tsin kiann-hiânn, tān-sī pò-kò kóng tī tsiap-tiám í-hā buē kám-kak tio̍h thiànn, gāi-gio̍h ia̍h-sī kî-thann ti-kak. M̄-koh, i--ê tsíng-thâu suî khai-sí hàm-tsíng kah khí-oo-tshenn, in-tuann i--ê kiânn-khì-hē-thóng ti̍t-ti̍t kā hueh phah-li̍p ū-khì-bô-huê--ê hit khu. Tsíng-thâu uì tē it kah tē jī ê kut-lûn tiong-ng hōo tsia̍t-tn̄g.
試驗19：
Tshì-giām 19:
試驗材料：1 x Pratt & Whitney F100 噴射機エンジン，收囥區19b強固過的天篷。
Tshì-giām tsâi-liāu: 1 x Pratt & Whitney F100 phùn-siā-ki iân-jín, siu-khǹg-khu 19b kiông-kòo kuè--ê thian-pông.
步數：共SCP-170抹佇噴射機エンジン的架仔，隨捒入去房間的天篷3.2 cm(量其約1.25英吋)。接好穩當的燃料供應佮控制系統了後，起動噴射機エンジン。
Pōo-sòo: Kā SCP-170 buah tī phùn-siā-ki iân-jín--ê kè-á, suî sak--li̍p-khí pâng-king--ê thian-pông 3.2 cm (Liōng-kî-iok 1.25 ing-tshùn). Tsiap-hó ún-tàng--ê jiân-liāu kiong-ìng kah khòng-tsè hē-thóng liáu-āu, khí-tāng phùn-siā-ki iân-jín.
結果：エンジン連紲高速運作40分鐘，仝時陣用翕像機監視合喙敢有受壓力的任何兆頭。佇合喙四圍的紅毛塗出現細條必巡的時，著算講受著120,000梁褪[1]的力，兩種材料嘛無表現出任何可能結構荏弱抑是分離的兆頭。
Kiat-kó: Iân-jín liân-suà ko-sok ūn-tsok 40 hun-tsing, kâng sî-tsūn iōng hip-siōng-ki kàm-sī kap-tshuì kám ū siū ap-li̍k--ê līm-hô tiāu-thâu. Tī kap-tshuì sì-uî--ê âng-mn̂g-thôo tshut-hiān sè tiâu pit-sûn--ê sî, tio̍h-sǹg-kóng siū tio̍h 120,000 Niû-thǹg[1]--ê la̍t, nn̄g tsióng tsâi-liāu mā bô piáu-hiān tshut līm-hô khó-lîng kiat-kòo lám-jio̍k ia̍h-sī hun-lî--ê tiāu-thâu.
[1]I̍k-tsù: Newton, kè-sǹg li̍k--ê tan-uī, sù 1 kg--ê mi̍h-kiānn sán-sing 1 s^2 ka-sok-tōo--ê la̍t kiò-tsò 1 Niû-thǹg.
創作內容
SCP-170 一支強力膠 tsi̍t ki kiông-li̍k-ka (台羅文版/教育部推薦漢字版)
SCP台灣分部腦洞 (6)