千呼萬喚始出來,日本樂隊DIR EN GREY,正如網上消息一樣,佢地真係會黎香港!日子係10月28日星期五。14年喇,上一次見佢地真人時。本身今年2月會去日本見佢地,奈何農曆新年前機票稍貴。穩陣派嘅我,下次啦,一定有下次。我一定會創造下次。
DIR EN GREY官方網頁
網上流傳圖片
Diru(DIR EN GREY嘅簡稱)宣布9月喺台灣開2場演唱會,然後有人喺網上流傳一封Diru經理人公司sun-krad Co., Ltd.同意Diru喺香港、內地演出嘅信……成件事講到似層層咁。不過,經歷過Diru去台灣、大陸,而飛過左香港後,每次我都期待佢地順便過埋黎香港,但偏偏一而再見唔到佢地。
主音京領軍嘅sukekiyo 2015年都去過大陸……那(沒有)說好的香港呢?!有一個真事,或傳聞,偏真嘅,個人認為……話Diru當年(2001年、2002年)兩度黎香港,啲fans太瘋狂,跟佢地去酒店……好似成日尖叫吧……無禮貌……因而Diru憎左香港fans。
假設件事係真,我唔係以上嘅fans……(不過都試過對藝人無乜禮貌),我意思係咁岩我無跟Diru,所以我話假設。以上事件係真嘅話都唔出奇,無論邊個國家都好,日本fans可能唔會嘅,佢地好守禮。一般黎講,fans見到偶像,就會好興奮,甚或有啲失去理性,尤其外國偶像。我可以理解Diru可能覺得我地唔識尊重人,都可以理解fans可能過左火。
就黎係10萬年前嘅往事,我覺得大家都進步左。講我自己,睇多啲人地眉頭眼額,知道左要正視。長期唔理,人地可能唔高興。大則可能朋友都無得做,大則上司、資深同事、同事會比面色你睇。要來便來,Diru。
岩岩做左功課,Diru會喺九龍灣國際展貿中心展貿廳3 6樓開騷,會場可以容納1,200人。即係實有飛啦,問題係點排位入場,同點賣飛法。佢地10月28日開,通常一、兩個月前賣飛,我估快則8月尾開售。如無意外,到時我應該返緊工,未必第一時間撲到飛。
A小姐,嘔心黎講,令我又愛又恨嘅A小姐,佢日日刨facebook、Twitter等等,收料快,不過佢無搵我。都係好事,因為如果佢話一齊睇,我唔知講咩好。我唔想再一齊喇,點樣令大家好落台啲。我諗如果發生,我會話我未有野做,未有錢,遲啲再算。