創作內容

0 GP

毛毛的鬼故事或不祥經歷 好長!!

作者:“自動搜索”│2015-08-20 17:15:33│贊助:0│人氣:52
小學 - 男廁

係miss朱同呀朗無返學校果段時間,發生左一件事。

小息,我由課室,一個人行去廁所。廁所就響走廊嘅盡頭,呢層個廁所成日都開住門嘅。而開門嘅位置,有一幅全身鏡,所以當廁所開左門,我行近門時,係會係塊鏡到見到自己。

我如常望住自己,行入廁所。背後無人。

廁所入面四個廁格,我習慣性入左尾二果格。

坐低。

周圍好靜,靜到連水喉一滴一滴嘅水滴聲都聽到。

突然!

咯咯... 咯咯... 我右邊傳出敲廁格牆嘅響聲。

我無理會。

咯咯... 又黎。

後,唔單只係敲牆聲,我清楚聽到長手指甲刮響塊板嘅聲音,由高一直刮向下。

咔咔...咔咔...我一路都好驚呢d指甲刮嘢嘅聲,直到呢家咁大個都係。你話攞隻义刮響隻碟,我就一d感覺都無,但係用手指甲,就算係刮響個枕頭,我都會即刻軟腳蟹。

我打左個冷震。

之後仲離譜,我見到左邊廁格牆下面個罅隙位到有一隻好細嘅小朋友手伸過黎。 「有無紙呀...?」 好清楚聽到隔離問。把聲勁衰之餘已經聽到尾音傳來按捺不住嘅笑聲。 「有無...嘻嘻...紙呀...嘻!」 兩把聲響隔離忍笑。

我就知道,係d無聊同學嘅惡作劇。
果排,係岩岩miss朱同阿朗無黎返學嘅時份。
學校都指話係我亂講嘢胡言亂語,
所以要見我家長。

咁果段時間好多八厭同學或者
小惡霸都會黎恥笑我揶揄我。

「哈哈!我都唔想返學呀!快d講個鬼故黎嚇下我啦!」

「喂!音樂室有鬼呀?叫佢出黎見我!」

「喂!你望下你後面!」

佢地抱持大膽唔信嘅態度,得閒就黎惡作劇一番。

廁所入面,隻手一直攤着,問我索取紙巾。

提外一說,唔知大家有無聽過日本民間傳聞 - 花子。

果時校園間好興呢個鬼故事。

話說就係有個人去廁所,隔離伸左隻白曬曬嘅女仔手過去,
同樣係問佢有無紙,佢就遞左比佢啦,隻手就伸返入去喇。
之後就傳黎一把女聲,話:

「唔係呢d紙呀...」

「唔係呢d紙呀...」

坐係廁格果個人不以為然,就答:「你要什麼紙?」

把聲傳過黎:「你哄低睇下喇...」

廁格果個人又真係貪好奇,佢跪低,
慢慢將個頭哄落廁格側面條罅仔到。

唔見有腳,淨係見到有一束好長嘅頭髮垂住係地下,
然後,慢慢見到有個女人臉孔哄落黎。

「係呢d紙呀...」

「呀呀!」

原來,佢要嘅係佢塊臉,定頭髮,唔記得嚕。

故事完畢,
班惡作劇同學仔肯定就係想模仿呢個位嚇我啦。

我都唔知好嬲定好笑。

我都打算整古返佢。

我撕左d紙巾,搓成個波咁,
然後對準佢隻手,用黎掉下佢,
其實真係幾無聊。

一接觸到佢隻手,真係縮都縮唔切,
呀呀呀即刻係隔離依嘩鬼叫喪嗌,
反應之大,真係出乎我預料。
然後我狂拍右手面塊板,
嚇返隔離玩刮指甲聲果個轉頭。

開門聲響起。

「痴線架!好恐怖呀!」

隔離一路開一路叫罵。

我亦開門出去。

廁格門一開,就係對住洗手盆上面幅大鏡,
四格廁格從塊鏡到睇,一覧無遺睇曬。

最詭異嘅事情出現左。

我地差不多同一時間開門,
兩位同學仔企左係第一格廁格,
我如常係尾二個格,即係第三格。

我地三個係塊鏡到你眼望我眼,好靜,
大家都仲未消化到咩事,嗌都唔識嗌。

從鏡嘅倒影中,
第二格廁格,
即係我地中間果格,
空空如也,乜都無。

我見到頭先伸手過黎個同學手都震曬,
起勢拎隻手抹落條褲到。

「唔好啦,叫埋你個friend出黎啦。」

我膽粗粗先講,指了指最尾關了門果格。

「呃...得我地兩個係到之嘛...」

「痴線...唔玩喇,唔好玩既...走喇走喇...」

兩個講完,就即刻跑左出去。

我望住鏡入面得我一個嘅廁所,好靜,
靜到連水喉一滴一滴嘅水滴聲都聽到。

頭三格廁格打開住,最尾果間一直關上。
我當然唔敢打擾,快快低頭洗手,離開現場。

我在想...頭先果個同學嗌到鬼殺咁嘈,
佢摸到嘅究竟係咪真係果個紙巾球?

定係佢摸到嘅係其他野...

不得而知。

而我右手面嘅指甲刮牆聲,照佢地講,
唔係佢地整嘅,咁又會係咩黎...

可能果下推開條尾格門就會知,真相大白。

但係... 你想知嗎?

我就唔想喇。

洗過手,急急腳,離開。

各位巴絲打:
廁格底下果條罅,
真係...唔好亂咁望。


看更多投稿作品
引用網址:https://home.gamer.com.tw/TrackBack.php?sn=2936475
All rights reserved. 版權所有,保留一切權利

相關創作

同標籤作品搜尋:毛毛的鬼故事或不祥經歷

留言共 0 篇留言

我要留言提醒:您尚未登入,請先登入再留言

喜歡★s072225 可決定是否刪除您的留言,請勿發表違反站規文字。

前一篇:毛毛的鬼故事或不祥經歷 ... 後一篇:毛毛的鬼故事或不祥經歷...

追蹤私訊

作品資料夾

GrassiTW嗨嗨
看更多我要大聲說昨天18:03


face基於日前微軟官方表示 Internet Explorer 不再支援新的網路標準,可能無法使用新的應用程式來呈現網站內容,在瀏覽器支援度及網站安全性的雙重考量下,為了讓巴友們有更好的使用體驗,巴哈姆特即將於 2019年9月2日 停止支援 Internet Explorer 瀏覽器的頁面呈現和功能。
屆時建議您使用下述瀏覽器來瀏覽巴哈姆特:
。Google Chrome(推薦)
。Mozilla Firefox
。Microsoft Edge(Windows10以上的作業系統版本才可使用)

face我們了解您不想看到廣告的心情⋯ 若您願意支持巴哈姆特永續經營,請將 gamer.com.tw 加入廣告阻擋工具的白名單中,謝謝 !【教學】