創作內容

0 GP

毛毛的鬼故事或不祥經歷 好長!!!

作者:“自動搜索”│2015-08-20 17:07:52│贊助:0│人氣:70
小學 - 音樂室

繼續係小學。

話說有次響禮堂到練詩歌,我同另一個都係負責樂器嘢嘅同學仔呀朗一時唔記得拎d三角鈴呀、
搖鼓呀落黎,於是乎我地就要上返去音樂室到拎。

學校音樂室位於七樓,係學校嘅頂層,
呢層有音樂室,美勞室,雜物房同廁所。

當時應該係下午一點左右,
我地上午班學生專登留低響到練歌,
下午班就岩岩返緊,所以呢個時段學校都唔會多人,
特別係頂層嘅音樂室。

我地兩個人仔沿住樓梯一路行上去,
一層,兩層,終於,黎到頂層。

呢層係密封式設計,所以就算下午,
都唔會有太陽曬到,長期都黑蚊蚊咁。

音樂室就響走廊第二間房的左手面。
我地沿住一路行,走廊兩邊掛滿左果d音樂家、藝術家嘅畫像。
即係巴哈呀、柴可夫斯基果d。

D大人可能覺得掛佢地嘅畫像可以令藝術層次高d,
但我至細行過呢d畫像,都覺得毛管棟,
好似一對對眼珠睥住你行咁。
純粹個人感覺,touch wood 無真正見過呢d畫像有恐怖嘢。

咁我地行到音樂室門口,咦喂,有d琴聲係入面傳出黎。
唔係一首歌咁,係幾下單音,停下彈下,停下彈下咁。

m m m r 。。。m s t'。。。

我同阿朗都聽到,心諗邊個同學咁早就練琴,我地慢慢趟開對門。
妖,原來係miss朱坐左係到彈琴。

Miss 朱係教開中文嘅,金絲眼鏡,文文靜靜,平日好少出聲果種。

我同阿朗行入去:
「miss朱,我地黎拎樂器落禮堂架。」

Miss朱低頭望住琴鍵,無應我地。我地急急腳打算行去旁邊櫃桶拎嘢。

突然,我地一齊聽到一把好輕嘅女人聲講: 「落返去啦。」

把聲好近,好以響耳邊講咁。
我向miss朱望去,佢仍然無郁過坐響琴到。
個把聲好中性,唔係好肯定係咪佢發出黎。

「落返去啦。」 再一次,我地清楚咁聽到。

我同阿朗呆一呆,阿朗打算再問。

「下面要樂器…」

唔問由至可,一問,
miss 朱好大力咁雙手拍落d琴鍵到,
d琴聲發出左一下怪音。

嘩!我同阿朗心知唔妥,
即刻走人啦,一齊衝返落禮堂。

氣來氣喘落到去,班主任見我地兩手空空,
就問我地做乜去左咁耐都拎唔到d樂器落黎。

我咪如實咁講囉:

「頭先miss朱係音樂室到彈琴,佢唔...比我地攞d樂器。」

「miss朱點會唔俾你地攞?唔好講大話。」

「係...係真架...」

「Miss 朱,一直都同我地一齊。」

「吓...」

我同阿朗即刻就知奶野啦,跟手仲見到miss朱,
同一件衫同一裝束咁響禮堂幫緊手,
頂樓到禮堂只有一條樓梯,佢無理由快得過我地落得返黎...

「你地兩個同我快d返上去拎過。」

嚴厲嘅班主任唔信我地之餘,仲叫我地上返去。

真殘忍。

細細個嘅我地,緊係局上啦,
兩個一路行,就一路驚,
心諗如果仲見佢響音樂室咁點算。


果然不負所望啦…一去到走廊,已經聽到d琴聲。仍然係斷斷續續嘅單音。

我同阿朗響門口前,由門口個窗裝入去,係…miss 朱。

一樣都係個頭哄到好低咁,望住d琴鍵。阿朗即刻腳都震曬,我地都意識到,眼前嘅野應該係…果味嘢。

咁,都係要拎嘢架啦。

年紀輕輕嘅我地,對於果味嘢同對於班主任,兩者都係驚架啦。

我趟開門。

琴音停左。 「唔…唔好意思…我地拎嘢落去架咋…」阿朗一路行過去一路講。
如是者,我地快手開櫃,揀都無揀,成蘺鈴鈴樂器拎住就走。擰返轉身,行去門口,miss 朱都係一路dup低頭。 「goodbye miss朱…」走嘅時候,我地禮貌咁講。

唔好嚇我地呀…唔好嚇我地呀…

一路關門,我一路諗。

門關上,無事。我地即刻「嘩嘩聲」9秒9跑落樓梯。

跑呀跑…跑呀跑…

而阿朗,真係嚇到賴左尿。

一路跑,一路滴尿。

一條水滴路沿住樓梯落。

情有可原。


返到禮堂,
都係見到miss朱正正常常係度
教d學生企位呀等等。

之後,阿朗有一段時間唔敢返學,佢阿媽同校方投訴,
話我講恐怖嘢嚇親佢個仔。

呢個就係我之前提個嘅見家長喇。

我阿媽聽到後,其實都無乜鬧我,
因為都見怪不怪喇,淨係講左句:

「比心機讀書啦,老師話唔駛你管樂器喇。」

果下,我係好唔開心。

因為我無講大話,見又係一齊見到,
本來有得管音樂組d樂器,
我係覺得好榮幸好威既。

突然話比第二個做,好失落。
果時唔知點解唔知點形容,
淨係覺得好唔開心。

而家諗返,其實就正如,
你打工好努力做緊份Project,
但係無啦啦比人怪你累街坊,
然後仲要唔駛你跟喇,
比阿邊個邊個跟啦咁嘅感覺。

阿朗有一段時間唔敢返學。

呢件事之後嘅一星期到,
校方話miss 朱因為意外,
跌斷左隻腳。住左醫院一個月。

果段時候,校內老師們都無再講起呢件事。

又因為呢件事,阿媽帶左我去飲符水。

我無講過任何一句嚇壞阿朗既說話,
全部都係我地一齊見到嘅,
但之後聽佢講返,
我知道,
佢同我見到嘅嘢有d出入。

因為當日,第二次上去音樂室,
我見到坐響琴凳嘅miss朱,係得上半身嘅。

腰以下係連住張凳,見唔到腳。

而當我地拎住d樂器由走廊衝落樓梯果下,

我feel到,

我,阿朗,之外,

有第三對腳係我隔離同我地一齊平排咁跑。

只係一個得下半身「腳」嘅白色輪廓,
落到樓梯,就消失左。

當阿朗返番學嘅時候,我當然無問佢喇。

我寧願相信,

應該係我一時眼花啫。
看更多投稿作品
引用網址:https://home.gamer.com.tw/TrackBack.php?sn=2936464
All rights reserved. 版權所有,保留一切權利

相關創作

同標籤作品搜尋:毛毛的鬼故事或不祥經歷

留言共 0 篇留言

我要留言提醒:您尚未登入,請先登入再留言

喜歡★s072225 可決定是否刪除您的留言,請勿發表違反站規文字。

前一篇:毛毛的鬼故事或不祥經歷... 後一篇:毛毛的鬼故事或不祥經歷 ...

追蹤私訊

作品資料夾

a891030大俠愛吃漢堡包
我他媽射到爆看更多我要大聲說12小時前


face基於日前微軟官方表示 Internet Explorer 不再支援新的網路標準,可能無法使用新的應用程式來呈現網站內容,在瀏覽器支援度及網站安全性的雙重考量下,為了讓巴友們有更好的使用體驗,巴哈姆特即將於 2019年9月2日 停止支援 Internet Explorer 瀏覽器的頁面呈現和功能。
屆時建議您使用下述瀏覽器來瀏覽巴哈姆特:
。Google Chrome(推薦)
。Mozilla Firefox
。Microsoft Edge(Windows10以上的作業系統版本才可使用)

face我們了解您不想看到廣告的心情⋯ 若您願意支持巴哈姆特永續經營,請將 gamer.com.tw 加入廣告阻擋工具的白名單中,謝謝 !【教學】