逐家好，
我是某佇，我家己佇第二代ê時陣就開始攑525咧拍，
第二代上懸ê分數是4模式S+，
第三代最近因為落難杯第三屆 ê 關係，我 khah 開時間拍搶地佮搶塔，sīn紲 kā 積分 peh 起去S+1，雖罔想 beh S+10 ê 時陣 khah 來寫，毋過最近會開始無閒，所以我決定緊寫寫--ê，按呢就毋免 hō͘ 家己上大 ê 壓力。
======================================
首先是
配裝
525是一支懸回報懸死亡ê武器，
因為按呢，我主要三項是配快速重生/主武省墨水/隱跳，
- 快速重生、隱跳、0.1躘天加速：為著趕緊轉去戰場。
- 主武省墨：525 愛走去頭前佮人 kah，佮人噴，閣愛掔水簾去掩護家己 or 隊友，本體 ê墨水需求又閣有夠討債，無配除非人 gâu，抑無逐工喝無墨水就飽 ah。
- 0.1 ê SP保留佮 0.1 ê SP Chhià-chi̍h 加速：這代525有媠氣彈，這實在足芳，我本底逐不時咧罵.52+媠氣彈傷過 m̄-bè-lên-suh，不而過這代換做525有這套組合……我：
毋過到這站仔猶毋是足OP啦……畢竟武器本體性能佇遐，廚袂起來。
- 0.2副武器影響減少：525 ê 頓蹬傷長，逐不時hŏng 掔菝仔，啉西打，有配會當減少hŏng炸上天ê聲。
- 0.1對手墨水影響減少：525實在無法度糊塗跤，配按呢有較好無。
- 0.1墨水恢復加速：方便繼續壓制對面咧用，525順風時就是愛共人硩死。
Kah銃觀念
愛先會記得：
「Kah銃進前ê準備較重要kah銃。」，525雖然有一下掔水簾隨噴過去 ê OP Combo，佇菜鳥仔場這無人會曉阻止，毋過佇高手帶，逐家攏知影面對525 ê 時陣愛做啥，所擺若欲佮人交戰，就愛注意附近塗跤ê墨水，隊友敢有SP，這馬是搢風抑是順風？我家己敢有絕步？
525本體：
- 噴過去威力提升去52.5，只是愛佇遐做炮台，本體 ê 準度干焦愛捷練習 khah 有，試合開始進前我攏會直直考銃，保持家己 ê 準度。
- 雖然講噴過去共人刣掉是siōⁿ緊 ê 方法，毋過毋是所有 ê 狀況都適合，徛射雖然準度誠䆀，毋過有幾若个狀況愛徛射：
- Phè後斗：差不多有30% ê 狀況愛按呢做，525噴過去傷gâu頓蹬，有時仔phè後斗噴過去結果對方徙位傷奇怪，顛倒無刣掉煞hō͘對面直接拍死，按呢真正無彩。
- 懸台：有當時仔懸台傷細，噴loe̍h落地結果優勢無去，所擺這个狀況我mā袂噴。
水簾:
- 水簾若欲掔，上好是狹狹長長ê地形，當然毋是每一个地場攏是按呢，所以掔進前愛注意邊仔敢有地，毋通規塗跤攏是敵人--ê，按呢 in 目nih仔就泅過來倚近ah，你偌準mā無效。
- 會使輔助隊友，不止仔掔 hō͘ 家己，有時仔會使 hō͘ 隊友，我足愛 hō͘ Sú-sih/.52/.96...etc。
- 若是lo͘h-á想欲用地形 ê 懸低差去壓制，會使掔佇遐共伊擋。
![]()
媠氣彈：
- 不管án-ná Nerf，這个絕步佇「強制落塔/強制搶地/強制阻止魚仔/強制擋人掔蚶仔」都有優勢，所擺若準時間欲到矣，我遮是領先--ê，我定定會去抾SP，hō͘人知影啥物是袂使倒反ê絕望，毋過終極發射會使一炮送媠氣彈上天，這真正愛注意。
其他注意事項：
- 開場就愛注意敢有剋星 譬如4K/重格/O͘-hù-lo͘h/重桶，若有伊佇佗位？盡量每一秒都愛數念伊，根據剋星 ê 位置去徙位。
- 假使狀況傷䆀拍袂著，會使去做Support，譬如抾SP/掔水簾掩護隊友，我peh分 ê 時陣有幾若場就是按呢拍甲贏--ê。
開場觀念
其實我模式khah熟--ê 是塔 kap 地，觀念我會講塔 kap 地，其他兩个請高手補充。
共同
- 揤X觀察對面 ê gí-á，注意lo͘h-á kap bi-泅，尤其是中-lo͘h 配 bi泅，這525真正驚。看地圖看in一開始是按怎走。
塔
- 若是隊友有人徛塔，規隊SP會自動 chhià-chi̍h，對面搶著 ê 時陣 in嘛是會開始 chhià-chi̍h SP。
- 若是防守成功，塔無人欲轉去中央，徛佇塔頂塔轉去ê速度會 khah 緊，彼時嘛是會 chhià-chi̍h SP。
- 525因為武器性能關係，盡量做佇頭前壓制ê人，毋過過檢查點 ê 時陣會使做伙徛一下，按呢會使加速通過。
- 若是對面占著，mài硬衝，彼會做水餃，愛等隊友、抾SP、掔水簾妨礙對面，揣機會突擊。
- 若是欲結束，家己是領先--ê，會使去抾SP，強迫 in 落塔。
地
- 地 hō͘ 占去 ê 彼爿會自動 chhià-chi̍h SP，所以若是 hŏng 占去就 mài 趕緊，先沓沓仔攢SP揣機會。
- 若是搶著地就揣機會向頭前壓制，525本身僫糊地，會使向前刣人就向前刣。
- 若是無法度向前，防守捷用水簾，無一定愛噴過去，掔一下佇遐擋銃子嘛有效果。
=====================
感想：我第三代本來無按算peh分peh遐爾緊（對我來講，我倒佇椅仔頂荏懶 khah 是正常），毋過我進前參加落難杯三，無疑悟 hō͘ 魔王—Edison揀著，伊教我足濟觀念，為著感謝伊無 àm-kàng，無私心--ê共我教，改善我誠濟缺點，雖然尾局毋是bàng-gah，阮提著亞軍，不而過因為這屆比賽，我有勇氣去佮人相戰，去相信我是有才調--ê，嘛因為一屆，我終其尾袂逐工死死死，進前死十擺是正常，Chit-má 死十擺我就愛去反省拄仔我是咧創啥潲，這是我上大 ê 改變。
=====================
感謝有內心看甲遮 ê 逐家！有緣再會。
創作內容
Splatoon 3 - Khé-lū-bīn 525 S+ 心得（Ver 1.0 台語版）
SF (4)